विभाग आठरावा : बडोदें ते मूर
मदारीपूर, पो ट वि भा ग.- पूर्वबंगाल, फरीदपूर जिल्ह्यांतील एक पोटविभाग. याचें क्षेत्रफळ ८१० चौरस मैल आहे. लोकसंख्या (१९११) ८१६२०३ असून यांत १५९९ खेडीं आहेत. पोटविभागाचें मुख्य गांव मदारीपूर आहे. १८७४ सालीं बकरगंज जिल्ह्यापासून वेगळें करून फरीदपूर जिल्ह्यांत घातलें आहे. तागाचें पीक फार मोठें होतें व तागाचे जिन्नसहि फार मोठया प्रमाणावर येथें तयार होतात. मधुमती-कुमारबीज नांवाचा आगगाडीचा फांटा चालू झाल्यापासून येथील व्यापार बराच वाढला आहे. मदारीपूर खेरीजकरून आणखी बऱ्याच व्यापारी पेठा आहेत.
गां व.- पोटविभागाचें मुख्य ठिकाण. याची लोकसंख्या सुमारें १९ हजार. मदारीपूर येथें तागाचा व्यापार फार जोरानें वाढत आहे. येथें दोन बाजर भरतात. बहुतेक व्यापारी एतद्देशीय आहेत. इंग्रज लोक तागाच्या व्यवहारांत विशेश लक्ष घालतात. खुलना रेल्वे स्टेशनशीं मदारीपूरचें दळणवळण फार असतें. येथें १८७५ सालीं म्युनिसिपालिटी स्थापन झाली.
